NMC ਵੱਲੋਂ 2024-25 ਲਈ 10,650 ਨਵੀਆਂ MBBS ਸੀਟਾਂ, 41 ਨਵੇਂ ਮੈਡੀਕਲ ਕਾਲਜਾਂ ਨੂੰ ਮਨਜ਼ੂਰੀ

ਨਵੀਂ ਦਿੱਲੀ, 19 ਅਕਤੂਬਰ  – ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਆਜ਼ਾਦੀ ਦਿਵਸ 2024 ਦੇ ਵਾਅਦੇ, ਜਿਸ ਵਿੱਚ ਅਗਲੇ ਪੰਜ ਸਾਲਾਂ ਵਿੱਚ 75,000 ਨਵੀਆਂ ਮੈਡੀਕਲ ਸੀਟਾਂ ਬਣਾਉਣ ਦੀ ਗੱਲ ਕਹੀ ਗਈ ਸੀ, ਦੇ ਤਹਿਤ ਇੱਕ ਅਹਿਮ ਕਦਮ ਚੁੱਕਦੇ ਹੋਏ, ਨੈਸ਼ਨਲ ਮੈਡੀਕਲ ਕਮਿਸ਼ਨ (NMC) ਨੇ ਅਕਾਦਮਿਕ ਸਾਲ 2024-25 ਲਈ 10,650 ਨਵੀਆਂ MBBS ਸੀਟਾਂ ਨੂੰ ਪ੍ਰਵਾਨਗੀ ਦੇ ਦਿੱਤੀ ਹੈ।
ਇਹ ਵਾਧਾ ਭਾਰਤ ਵਿੱਚ ਮੈਡੀਕਲ ਸਿੱਖਿਆ ਦੀ ਉਪਲਬਧਤਾ ਨੂੰ ਵਧਾਉਣ ਦੀ ਵਿਆਪਕ ਰਣਨੀਤੀ ਦਾ ਹਿੱਸਾ ਹੈ। ਇਸ ਦੇ ਨਾਲ ਹੀ, 41 ਨਵੇਂ ਮੈਡੀਕਲ ਕਾਲਜਾਂ ਦੇ ਜੁੜਨ ਨਾਲ ਦੇਸ਼ ਵਿੱਚ ਮੈਡੀਕਲ ਸੰਸਥਾਵਾਂ ਦੀ ਕੁੱਲ ਗਿਣਤੀ 816 ਹੋ ਗਈ ਹੈ।
NMC ਦੇ ਮੁਖੀ ਡਾ. ਅਭਿਜਾਤ ਸੇਠ ਅਨੁਸਾਰ, ਅੰਡਰ-ਗ੍ਰੈਜੂਏਟ (UG) ਸੀਟਾਂ ਦੇ ਵਿਸਥਾਰ ਲਈ ਪ੍ਰਾਪਤ ਹੋਈਆਂ 170 ਅਰਜ਼ੀਆਂ ਵਿੱਚੋਂ (ਜਿਨ੍ਹਾਂ ਵਿੱਚ 41 ਸਰਕਾਰੀ ਕਾਲਜਾਂ ਅਤੇ 129 ਨਿੱਜੀ ਸੰਸਥਾਵਾਂ ਦੀਆਂ ਸਨ), ਕੁੱਲ 10,650 MBBS ਸੀਟਾਂ ਨੂੰ ਮਨਜ਼ੂਰੀ ਦਿੱਤੀ ਗਈ ਹੈ। ਇਸ ਨਾਲ 2024-25 ਅਕਾਦਮਿਕ ਸਾਲ ਲਈ MBBS ਸੀਟਾਂ ਦੀ ਕੁੱਲ ਗਿਣਤੀ, ਜਿਸ ਵਿੱਚ Institutes of National Importance (INI) ਦੀਆਂ ਸੀਟਾਂ ਵੀ ਸ਼ਾਮਲ ਹਨ, 1,37,600 ਹੋ ਜਾਵੇਗੀ।
ਪੋਸਟ-ਗ੍ਰੈਜੂਏਟ (PG) ਕੋਰਸਾਂ ਲਈ, NMC ਨੂੰ ਨਵੀਆਂ ਅਤੇ ਨਵਿਆਈਆਂ ਸੀਟਾਂ ਲਈ 3,500 ਤੋਂ ਵੱਧ ਅਰਜ਼ੀਆਂ ਪ੍ਰਾਪਤ ਹੋਈਆਂ ਹਨ। ਡਾ. ਸੇਠ ਨੇ ਦੱਸਿਆ ਕਿ ਕਮਿਸ਼ਨ ਨੂੰ ਲਗਭਗ 5,000 PG ਸੀਟਾਂ ਦੇ ਵਾਧੇ ਦੀ ਉਮੀਦ ਹੈ, ਜਿਸ ਨਾਲ ਦੇਸ਼ ਭਰ ਵਿੱਚ PG ਸੀਟਾਂ ਦੀ ਕੁੱਲ ਗਿਣਤੀ 67,000 ਹੋ ਜਾਵੇਗੀ। ਇਸ ਸਾਲ UG ਅਤੇ PG ਸੀਟਾਂ ਵਿੱਚ ਕੁੱਲ ਵਾਧਾ ਲਗਭਗ 15,000 ਹੋਵੇਗਾ।
ਹਾਲਾਂਕਿ ਅੰਤਿਮ ਮਨਜ਼ੂਰੀ ਪ੍ਰਕਿਰਿਆ ਅਤੇ ਕਾਉਂਸਲਿੰਗ ਵਿੱਚ ਕੁਝ ਦੇਰੀ ਹੋਈ ਹੈ, ਅਧਿਕਾਰੀਆਂ ਨੇ ਭਰੋਸਾ ਦਿੱਤਾ ਹੈ ਕਿ ਇਹ ਪ੍ਰਕਿਰਿਆਵਾਂ ਨਿਰਧਾਰਤ ਸਮਾਂ-ਸੀਮਾ ਦੇ ਅੰਦਰ ਪੂਰੀਆਂ ਕਰ ਲਈਆਂ ਜਾਣਗੀਆਂ। ਆਉਣ ਵਾਲੇ ਅਕਾਦਮਿਕ ਸਾਲ ਲਈ ਮਾਨਤਾ, ਪ੍ਰੀਖਿਆਵਾਂ, ਅਤੇ ਸੀਟ ਮੈਟ੍ਰਿਕਸ ਮਨਜ਼ੂਰੀਆਂ ਦੇ ਕਾਰਜਕ੍ਰਮ ਦਾ ਵੇਰਵਾ ਜਲਦੀ ਹੀ ਪ੍ਰਕਾਸ਼ਿਤ ਕੀਤਾ ਜਾਵੇਗਾ। ਇਸ ਤੋਂ ਇਲਾਵਾ, 2025-26 ਦੀਆਂ ਅਰਜ਼ੀਆਂ ਲਈ ਪੋਰਟਲ ਨਵੰਬਰ ਦੇ ਸ਼ੁਰੂ ਵਿੱਚ ਖੁੱਲ੍ਹਣ ਲਈ ਤਿਆਰ ਹੈ।
ਜ਼ਿਕਰਯੋਗ ਹੈ ਕਿ ਡਾ. ਸੇਠ ਨੇ ਇਸ ਗੱਲ ‘ਤੇ ਵੀ ਜ਼ੋਰ ਦਿੱਤਾ ਕਿ ਹਾਲ ਹੀ ਦੇ ਇਤਿਹਾਸ ਵਿੱਚ ਇਹ ਪਹਿਲਾ ਮੌਕਾ ਹੈ ਜਦੋਂ ਮੈਡੀਕਲ ਅਸੈਸਮੈਂਟ ਐਂਡ ਰੇਟਿੰਗ ਬੋਰਡ (MARB) ਦੇ ਫੈਸਲਿਆਂ ਵਿਰੁੱਧ ਸਾਰੀਆਂ ਅਪੀਲਾਂ ਨੂੰ ਬਿਨਾਂ ਕਿਸੇ ਅਦਾਲਤੀ ਦਖਲ ਦੇ ਹੱਲ ਕਰ ਲਿਆ ਗਿਆ।
ਮੈਡੀਕਲ ਸਿੱਖਿਆ ਦੀ ਗੁਣਵੱਤਾ ਵਧਾਉਣ ਦੀ ਕੋਸ਼ਿਸ਼ ਵਿੱਚ, ਡਾ. ਸੇਠ ਨੇ ਇਹ ਵੀ ਐਲਾਨ ਕੀਤਾ ਕਿ NMC ਮੁੱਖ ਧਾਰਾ ਦੇ ਮੈਡੀਕਲ ਪਾਠਕ੍ਰਮ ਵਿੱਚ ਕਲੀਨਿਕਲ ਖੋਜ (Clinical Research) ਨੂੰ ਸ਼ਾਮਲ ਕਰਨ ਦੀ ਸੰਭਾਵਨਾ ਤਲਾਸ਼ ਰਿਹਾ ਹੈ। ਮੈਡੀਕਲ ਸਿੱਖਿਆ ਵਿੱਚ ਖੋਜ ਬੁਨਿਆਦੀ ਢਾਂਚੇ ਨੂੰ ਮਜ਼ਬੂਤ ਕਰਨ ਅਤੇ ਕਲੀਨਿਕਲ ਖੋਜ ਨੂੰ ਉਤਸ਼ਾਹਿਤ ਕਰਨ ਲਈ ਇੰਡੀਅਨ ਕੌਂਸਲ ਆਫ਼ ਮੈਡੀਕਲ ਰਿਸਰਚ (ICMR) ਨਾਲ ਸਹਿਯੋਗ ਕਰਨ ਦੀਆਂ ਯੋਜਨਾਵਾਂ ‘ਤੇ ਕੰਮ ਚੱਲ ਰਿਹਾ ਹੈ।
NMC ਦੇ ਇਹ ਯਤਨ, ਦੇਸ਼ ਵਿੱਚ ਮੈਡੀਕਲ ਸਿੱਖਿਆ ਸਮਰੱਥਾ ਨੂੰ ਬਿਹਤਰ ਬਣਾਉਣ ਦੀ ਦਿਸ਼ਾ ਵਿੱਚ ਇੱਕ ਕਦਮ ਵਜੋਂ ਦੇਖੇ ਜਾ ਰਹੇ ਹਨ, ਜੋ ਕਿ ਸਰਕਾਰ ਦੇ ਸਿਹਤ ਸੰਭਾਲ ਬੁਨਿਆਦੀ ਢਾਂਚੇ ਨੂੰ ਵਧਾਉਣ ਅਤੇ ਮੈਡੀਕਲ ਪੇਸ਼ੇਵਰਾਂ ਦੀ ਵਧਦੀ ਮੰਗ ਨੂੰ ਪੂਰਾ ਕਰਨ ਦੇ ਦ੍ਰਿਸ਼ਟੀਕੋਣ ਦੇ ਅਨੁਸਾਰ ਹੈ।